NILINAW ni Mariel Padilla na hindi gluta drip session ang nangyari sa opisina ng kanyang asawa na si Senador Robin Padilla na umani ng batikos mula sa publiko.
Sa isang Facebook Live nitong Sabado, iginiit ni Mariel na hindi siya nagpaturok ng glutathione na sinasabing nakakaputi.
Hindi aprubado ng Food and Drug Administration ang glutathione para sa pagpapaputi.
Related Article: Gluta drip session ni Mariel Padilla sa Senado, binatikos
”Every week, I have a Vitamin C drip. Diyan po kayo medyo relax lang kasi inisip niyo po na glutathione [drip] yung aking ginagawa. To let you know, para hindi kayo naniniwala sa fake news, Vitamin C po iyon. Matagal na namin iyan ginagawa, pandemic pa lang,” ani Mariel.
Wala rin daw siyang intensyon na bastusin ang Senado.
”My intention was to show that no matter how busy we are dapat pina-prioritize pa po rin natin ‘yung paglalagay ng bitamina sa ating katawan. I had no intention whatsoever to disrespect the Senate or anything like that,” sabi ni Mariel.
“Nagpunta po ako sa Senate for the Eddie Garcia Bill, hindi po ako nakikipunta doon lagi because I am a full-time mom and wife. Also, online seller po ako. Sobra talagang pinaghirapan ng asawa ko ang bill na ‘yan, I was there to support my husband,” dagdag pa ng dating TV host at ngayo’y digital creator.
“In my head I was in my husband’s office…I felt na safe place ‘yun because opisina po ng asawa ko.”
Inamin din ni Mariel na kaya niya binura ang kanyang Instagram post tungkol sa drip session dahil may mga ”na-offend.”
“Oh my gosh mayroon pa lang mga na-offend, okay, sige, i-delete ko. So, I deleted that post. But I never ever said that I was taking gluta drip. It was Vitamin C.”
”Dapat yung drip ko sa bahay talaga kaya nga lang tumagal eh hinintay ko yung asawa ko na 9 o’clock nasa opisina pa rin so sabi ko dito na lang, pumunta na lang sila dahil hindi ko naman inisipan na oh my gosh maging national issue pala that’s why I am saying sorry doon sa mga na-offend but it was never my intention na i-offend kayo.”
”Yung mga gustong mag-hate pa diyan, okay go.”
Samantala, pinagtawanan lang ni Senador Padilla ang isyu.
“Nakakatawa naman po ang political isyu na ‘yan, my goodness. Kung may nakita po silang masama sa larawan na ‘yan, paumanhin po. No Intention of disrespect. My wife loves to promote good looks and good health,” pahayag ng senador.
