INSTANT tourist attraction ngayon ang paglitaw ng isang lumang bayan na dati nang naglaho sa mapa ng Nueva Ecija.
Photo Courtesy: Maridy Balete Lopez | Facebook
Dekada 70 ng sadyang abandonahin at palubugin ang bayan ng Pantabangan nang itayo ang water dam. Nasa 2,000 residente ang pinalikas nang itayo ang Pantabangan Dam. Ngayon, isa na itong multi-purpose dam na ginagamit sa irrigation, hydroelectric power, at nagsisilbing flood control sa rehiyon.
At panaka-nakang lumilitaw ito kapag sobrang baba ng lebel ng tubig.
At ngayong bumaba ang lebel ng tubig sa probinsiya bunsod ng El Niño, kita na muli ang dating St. Andrew the Apostle Parish Church na isa sa mga sikat na landmarks ng dating bayan. Kita rin ang dating sementeryo.
Photo Courtesy: Tal Pineda | Facebook
“Yung pagkakalitaw ng lumang bayan natin siguro ay dahil ngayon ay ika-golden anniversary,” pabirong kwento ni Mayor Roberto Agdipa sa GMA Regional TV One North Central Luzon.
Ayon pa sa ulat ng GMA Regional TV kahapon, May 2, nakapagdaos pa ng misa ang Diocese ng San Jose, Nueva Ecija sa ibabaw ng lumubog na bayan ng Pantabangan.
Sa kasalukuyan, dinarayo ng mga turista upang masilayan ang lumitaw na bayan ng Pantabangan, pati na rin ang mga dating residente nito.
Pero hanggang alas-12 ng tanghali lamang pwedeng bisitahin ang lugar, dahil ayon sa otoridad, malalakas at malalaki ang alon sa hapon at baka hindi kayanin lalo ng maliliit na bangka.
Labis naman ang tuwa ng mga bangkero dahil kahit pa sobra ang init ngayong panahon, nagkaroon sila ng pagkakakitaan.
“Nababalitan namin itong Pantabangan at napapanood sa news, pagkakataon na naming pasyalan to,” ayon kay Hervy Santos.
Mula 2020, ito na ang ika-anim na beses na nasilayan ang lumang bayan ng Pantabangan, ayon sa local tourism office ng lugar. At dati nang idineklarang heritage zone ang “Old Pantabangan Ruins”.
“Kapag heritage zone po kasi dapat natin protektahan ito, para makita pa ng mga susund na henerasyon,” ayon kay Emisonia Gante, tourism officer ng Pantabangan.
