NAIS ng University of the Philippines Los Baños (UPLB) sa Laguna na buksan ang programang pagpaparenta ng e-bikes at e-scooters para sa mga estudyante, guro, at mga tauhan nito na maaaring gamitin sa paligid ng kampus.

Ito ang magiging kauna-unahang bike rental sa loob ng pisang campus sa Pilipinas.  Ayon sa website ng UPLB, sa pakikipagtulungan ito ng UPLB at ng Tipaklong Sustainable Mobility, Corp. 

Photo Courtesy: UPLB | Website

Ayon sa unibersidad, maaaring mag-book ng bisikleta ang komunidad ng UPLB gamit ang isang mobile application. Sa loob ng trial period, maaaring umarkila ng e-bike at e-scooters, katuwang ng kanilang partner firm.

Habang bibigyan naman ang mga security officer sa loob ng unibersidad ng mga bike unit at mag-iikot upang masiguro ang safety operations ng proyekto.

Samantala isinasagawa rin ngayon ang isang feasibility study upang malaman kung ilan at layo ng biyahe gayundin ang dami ng maiiwasang carbon dioxide emissions upang lalong mas mapabuti pa ang programa.

“As a national university, we need to be conscious of our carbon footprint and proactively engage our constituents with our efforts to be steadfast stewards of our environment,” ani Roberto P. Cereno, vice chancellor ng UPLB Community Affairs.

“This is us taking a revolutionary step. One way of looking at it is by focusing on our transport system,” dagdag pa niya.

Isinusulong ngayon sa buong mundo ang paggamit ng bike kaysa sa mga sasakyan o motorsiklo upang mabawasan ang carbon footprint sa daigdig.

Ayon pa sa website ng UPLB, ang kolaborasyon na ito ay bahagi ng Green Mobility Initiative (GMI), na nagsusulong at nagpapatibay sa mga kagawiang environment-friendly.

Magdadagdag din ng  bike racks sa iba’t ibang bahagi ng kampus upang mahikayat ang buong komunidad ng UPLB na magbisikleta, hudyat din ng kanilang  kampanyang “green and active transport” sa buong unibersidad.