NAKA-ALL white, may belo, at suot na singsing ang Gen Z actress na si Andrea Brillantes sa kanyang Instagram story nitong Sabado.
Sa unang tingin, aakalain mong sa kasalan pupunta ang aktres. Pero sa sumunod na Instagram story, sa fan meet pala ni South Korean actor Kim Soo-hyun dumeretso si Brillantes.
Nasa Pilipinas si Kim nitong weekend para personal na makita ang Filipino fans sa kanyang “Eyes On You” fan meet sa Araneta Coliseum sa Quezon City.
Agaw-pansin ang outfit ni Brillantes na nagmistulang bride sa event. Nakasuot siya ng puting blazer, palda at veil, at may hawak pang bulaklak.
Bago ito, nag-post ang aktres ng kanyang mirror selfie kasama ang kanyang glam team at sinabing “big day.” Sumunod dito ang kapansin-pansing singsing sa kanyang kanang kamay na nakapatong sa palda.
Kaparehas pa nga niya ng kulay ng outfit ang “Queen of Tears” actor na nakasuot ng white suit.
“Hi hubby…HUBBY???” saad ni Brillantes sa caption na may wedding rings sticker.
Nagkaroon din ng ilang interactions sina Brillantes at Kim, kabilang na ang pagkaway sa kanya ng “It’s Okay to Not Be Okay” star.
Nag-flying kiss at nag-finger heart din sa kanya ang aktor.
“Yes po I do po,” wika ni Brillantes.
“What a night. We love you!!!” pahayag niya sa isa pang Instagram story.
Naging pakulo na ng Filipino fans ang pagsuot ng bridal outfit tuwing may concert o event ang kanilang paboritong South Korean artists.
May ilan ding nagsusuot pa ng mga nakatutuwang costume para mapansin ng kanilang mga iniidolo.
‘Eyes on You’ fan meet
Iba’t ibang aktibidad din ang inihanda para kay Kim at sa kanyang fans sa “Eyes On You” fan meet nitong Sabado.
Una na rito ang pagharana ni Kim sa audience gamit ang kantang “Love You With All My Heart,” isa sa soundtracks sa “Queen of Tears” na orihinal na kinanta ni South Korean singer-songwriter Crush.
Hindi rin ligtas si Kim sa pagbanggit ng ilang Filipino slangs tulad ng “omsim” na ang ibig sabihin ay mismo, “eme lang” at “charot” na ang ibig sabihin ay biro lang.
May ilang maswerteng fans din ang nakalaro si Kim sa stage para sa relay game. Ang mga nanalo sa palaro ay nakatanggap ng kwintas mula sa aktor.
Tila naging “King of Tears” si Kim sa kanyang speech sa event. Paliwanag niya, naging emosyonal siya dahil nakikita niyang nakangiti ang fans.
May video tribute din ang Pinoy fans kung saan ipinahayag nila ang kanilang suporta’t pagmamahal sa aktor.
Bago matapos ang fan meet, sinabi ni Kim ang plano niyang bumalik muli sa bansa ngayong taon.
Nitong 2023, nasa Pilipinas ang South Korean actor para sa fan meet na inorganisa ng donut brand na kanyang ineendorso.
Bumida sa Kim sa ilang sikat na Korean dramas tulad ng “Moon Embracing the Sun,” “My Love from the Star,” “Dream High,” at “The Producers.”
Bukod sa kanyang talento sa pag-arte, kilala rin si Kim sa kanyang husay sa pagkanta ng soundtracks ng mga K-drama, kabilang na ang “Way Home” na ni-record niya para sa “Queen of Tears.”
