IT feels like we’ve been transported to a world of dreams and fantasies sa katatapos lang na fairytale-inspired Star Magical Prom 2024, kung saan nagtipon-tipon ang ilan sa mga pinakamaningning na bituin ng henerasyon.
Agaw-pansin sa kanilang glitzy and glamorous outfits, pinakainabangan din kung sino sa kanila ang tatanghaling royalty awardees ngayong taon.
Prom king and queen
Kinoronahan ang tambalang KD Estrada at Alexa Ilacad bilang 2024 Star Magical Prom King and Queen na nasungkit nina Donny Pangilinan at Belle Mariano, o kilala rin bilang “DonBelle,” noong nakaraang taon.
Ayon sa artikulo ng ABS-CBN, ito ang “first ever” prom nina Ilacad at Estrada. Sabi ni Estrada, hindi niya naranasang mag-prom noong high school. Itinuturing naman ni Ilacad ang event bilang una niyang “legit prom” dahil high school night lang ang meron sa kanyang eskwelahan.
Tila parang si Ariel ng “The Little Mermaid” si Ilacad sa kanyang mermaid-inspired gown na gawa ng fashion designer na si Ehrran Montoya na tinernohan niya ng isang clamshell purse.
Mala-Prince Eric naman si Estrada sa kanyang navy blue suit.
Nakuha rin nina Ilacad at Estrada ang pinakanakakakilig na Best Promposal.
Royal Prince and Princess
Itinanghal naman ang Kapamilya stars na sina Matthew Cruz at Anji Salvacion bilang Royal Prince and Princess.
Simple at elegante ang crystal-studded white gown ni Salvacion habang gray plaid suit na may malaking crystal chain ang ibinida ni Cruz sa prom.
Noble Prince and Princess
Wagi rin sina Harvey Bautista at Dalia Varde bilang Noble Prince at Princess.
Standout si Varde nang rumampa sa ivory carpet sa kanyang red rose-like dress na gawa ng fashion designer na si Mark Bumgarner. Mala-prinsipe rin si Bautista sa kanyang emerald green doublet na may gold appliqué details.
Charming Prince and Princess
Charming Prince and Princess naman ng gabi sina Raikko Mateo at Trisha Gomez.
Blooming energy ang ipinakita ni Gomez sa kanyang flower-patterned dress na pinatungan ng colorful-beaded mesh fabric habang naka-royal blue suit naman si Mateo na likha ng fashion designer na si Paulo Lazaro.
Kinilala si Mateo bilang freshman prince noong 2023 Star Magical Prom.
