SB19, may bagong kanta sa Mayo!

MAGBABALIK-MUSIC scene ang P-pop powerhouse na SB19 sa susunod na buwan dahil nakatakda itong maglabas ng bagong kantang pinamagatang “Moonlight.”

Inanunsyo ito mismo ng quintet ngayong Lunes, April 22, at sinabing ilalabas nila ang “Moonlight” sa May 3, 2024. Collaboration song ito ng grupo kasama ang international DJs at producers na sina Ian Asher at Terry Zhong.

Nagbigay din ang SB19 ng 10-second snippet ng upbeat track na may lyrics na “Doin’ what we do in the moonlight.”

Ibinahagi na rin ni Zhong ang snippet ng kanta sa kanyang Instagram story. Nagcomment din siya sa Instagram post ng SB19 at sinabing, “Woohoo! Can’t wait to dance together in the moonlight.”

“Moonlight” ang comeback song ng SB19 ngayong taon, matapos ilabas ang latest album nitong “PAGTATAG!” noong June 2023. 

Matatandaang nagkaroon ng mga spekulasyon tungkol sa ownership rights ang SB19 sa kanilang group name at logo matapos nitong umalis sa dati nitong label na ShowBT Philippines at itinayo ang sariling kompanyang 1Z Entertainment. Pansamantalang tinawag ang SB19 members na “Mahalima” ng kanilang fans, o kilala bilang A’TIN, nang tanggalin nila ang pangalang “SB19” sa kanilang Instagram handles.

Pero noong taong ding iyon nagkaroon ng “amicable agreement” sa pagitan ng 1Z Entertainment at ng ShowBT Philippines. Matapos nito, nagpakita sa unang pagkakataon sa publiko ang boy group sa Asia Artist Awards (AAA) na ginanap noong December 2023 sa Philippine Arena sa Bulacan.

Noong buwan ding iyon nakipag-collaborate ang SB19 kay K-pop superstar Sandara Park para sa isang advertisement song ng isang electronics company.

Bago ang “Moonlight” announcement, nakatuon ang SB19 members sa kani-kanilang solo projects. Huling naglabas ng sariling kanta si Ken, o kilala rin bilang Felip, na pinamagatang “Fake Faces.”

#IanxSB19xTerry

Trending ngayon sa social media ang hashtag na “IanxSB19xTerry” matapos ianunsyo ng P-pop boy group ang kanilang bagong kanta. Maraming fans ang nagpahayag ng kanilang pagkasabik para sa comeback ng kanilang mga idolo sa P-pop industry.

Ilan sa kanila ang looking forward sa kung anong resulta ng kombinasyon ng P-pop at Electropop.

“So this is a P-POP x E-POP collab? Cooool!” saad ng isang netizen.

“It has classic or old school dance club beats that [are] fresh to SB19’s discography. Exciting,” sabi naman ng isang fan.

May isa ring online user ang naniniwalang magiging “epic” ang “Moonlight” gayong tatlong successful artists ang nag-team-up para rito.

Kasalukuyang naghahanda ang SB19 para sa upcoming concert nito sa Dubai sa April 24 bilang parte ng “PAGTATAG!” world tour. Nagsimula ang concert tour sa Pilipinas nitong June 2023, na magtatapos din sa Maynila sa May 18 at 19.