Tigil-pasada muling ikinasa

KASABAY ng inaasahang deadline sa consolidation ng mga public utility vehicles o mga lumang pampasaherong jeepney, nagkasa ang grupong Pagkakaisang Samahan ng mga Tsuper at Operators Nationwide o PISTON ng tigil-pasada sa darating na Abril 29-30.

Nauna dito ay kinalampag ng grupong PISTON ang Korte Suprema kaugnay sa hirit nilang petisyon sa temporary restraining order o TRO laban sa jeepney modernization program.

Mayroong ginawang kilos protesta ang grupo sa labas ng Korte Suprema kung saan hinimok nila ang mga mahistrado agad nang maglabas ng TRO.

“Dapat magsalita na ang Supreme Court. At kung hindi sila magsalita mayroon pa rin kaming supplemental petition na ihahain sa kanila,” sinabi ni Ruben Baylon, secretary general ng grupo.

“Umaasa pa rin kami na magbababa sila ng TRO panig sa mga mamamayan. Kung hindi, hindi kami mangingimi na ilaban ang tama sa kasalukuyan.”

Pero sakaling hindi magpalabas ng TRO, ay nagbanta silang itutuloy pa rin nila ang kanilang pamamasada kahit pa hulihin sila.

“Kahit dumating ang April 30,  bibyahe pa rin po ang mga operator na naninindigan para sa kanilang karapatan. Kung huhulihin, sanay na kami sa huli po. Araw-araw nahuhuli kami,” dagdag niya.

Pero naghahanda rin sila ng malawakang tigil-pasada sa April 29-30.

Anila, lalahok dito ang 250,000 na miyembro ng PISTON sa buong bansa.

“Pakiusap namin sa mga commuter na unawain ang kalagayan ng mga driver at operator dahil ito ay laban ng mga mamamayan. Ito ay laban ng malawak na sektor ng mga commuter,” sabi nito.

Unang sinabi ng Land Transportation Franchising and Regulatory Board at ni Pangulong Ferdinand Marcos Jr. na huling palugit na sa franchise consolidation ang Abril 30. 

Sa ilalim ng Public Utility Vehicle Modernization Program, kailangan ng mga operator na magbuklod sa ilalim ng isang transport cooperative bilang unang hakbang sa fleet modernization.