Alternative Delivery Mode sa mga eskuwelahan sa QC, epektibo na

NABAGO na ang setup sa mga paaralan dahil sa El Niño upang makaiwas ang mga estudyante sa health issues dala ng matinding init.

Una nang nag-abiso ang Department of Education (DepEd) na may karapatang magsuspinde ang mga opisyal ng paaralan ng in-person class dahil sa matinding init o anumang kalamidad.

Isa na ang Quezon City sa mga paaralang bumalik muna sa online class o Alternative Delivery Mode (ADM) upang matiyak ang kaligtasan ng bawat estudyante sa lungsod.

Laman ng anunsiyo ng QC LGU ang magiging takbo ng kanilang klase hanggang matapos ang school year.

“QCitizens, dahil sa pananatiling heat index sa 40°C at inaasahang pagtaas pa nito sa mga susunod na araw, magkakaroon ng pagbabago sa face-to-face class schedule sa mga pampublikong paaralan sa Quezon City simula May 8, 2024,” ayon sa kanilang Facebook post.

“Alinsunod sa DepEd Schools Division Memorandum No. 511, na inilabas noong Abril 6, 2024, ang mga klase ay lilipat sa limitadong face-to-face kapag umabot sa 40°C o higit ang heat index para sa mga gawain na kinakailangan para sa katapusan ng taon sa paaralan.”

Ayon pa sa Quezon City LGU kung ang temperatura ay nasa 39°C lamang, maaaring bumalik sa full face-to-face ang klase sa lahat ng paaralan, maliban na lang kung pinayagan na mag-blended learning.

May karapatan din ang mga magulang na magpasya kung papapasukin ang mga anak kapag masama ang pakiramdam, may kondisyon sa kalusugan at maaaring magkasakit dahil sa tindi ng init.

Kinakailangan lamang makipag-ugnayan sa mga opisyal o guro ng paaralan upang mabigyan ang bata ng angkop na learning set-up.

Sakop lamang nito ang pampublikong paaralan. Nakadepende naman sa mga opisyal ng pribadong paaralan ang pagsuspinde ng pasok, ngunit mas makabubuting sundin na rin ang anunsyo ng LGU o ng national government. 

Usap-usapan din nitong nakaraang araw ang napipintong pagbalik sa dating school calendar. 

Para sa nakararami, hindi nakabubuti na pumapasok pa ang mga bata sa buwan ng Abril at Mayo, lalo’t nakakaapekto sa maraming mag-aaral sa bansa ang matinding init dulot ng El Niño.