Pari, ginastos ang pera ng simbahan sa mobile game apps

BAGO dumating ang mga bagong laro na kinahuhumalingan ng mga kabataan ngayon, nariyan ang “Candy Crush Saga” at “Mario Kart Tour”.

Kung iisipin natin, ano nga bang kapahamakan ang naidudulot ng ganitong mga laro?

Kamakailan lang, isang nakakagulat na kaso ang hinarap ng isang Catholic priest mula sa Pottstown, Pennsylvania, sa Estados Unidos.

Inaresto noong April 25 si Reverend Lawrence Kozak sa kasong theft at felony. Pero nauna na siyang nasipa sa kanyang posisyon sa St. Thomas More Church November 2022. 

Napag-alamang ginamit niya ang pera ng simbahan para sa mga laro na kanyang kinakabaliwan, sa halip na ilaan sa pagpapabuti ng kanilang simbahan.

Ayon sa Archdiocesan Office, mahigit US $40,000 na pondo ng simbahan ang ninakaw ng dating pari at ginastos niya ito sa mobile at slot machine games tulad ng “Wizard of Oz,” “Cash Frenzy,” at “Willy Wonka Vegas Casino Slots.”

“Father Lawrence Kozak was placed on administrative leave by the Archdiocese in November of 2022. His administrative leave followed a review of Saint Thomas More Parish’s financial activity by the Archdiocesan Office for Parish Services and Support,” ayon sa isang pahayag.

“That review resulted in certain expenses and expenditure levels utilizing parish funds being questioned. The Archdiocese then referred the matter to law enforcement.”

“The Archdiocese and the parish will continue to cooperate with law enforcement as the criminal matter enters its next phase. Pending the outcome of the criminal prosecution, Father Kozak remains on administrative leave.”

Depensa naman ni Kozak, ang kanyang ginawa ay isang “powering up” sa mga laro at hindi pagsusugal. Aniya, naghahanap siya ng counseling sa kanyang addiction kung kaya’t mariin nitong itinanggi ang mga alegasyon.

Batay naman sa detective ng Pennsylvania State Police, nasa 2,000 na mga transaksyon na may label na “gaming” ang nakita sa kanyang billing statement mula September 2019 hanggang June 2022.

Sa kanyang Apple ID, gumastos umano ito ng $214,000 mula sa kanyang personal savings at $44,000 naman ang na-charge sa credit card ng simbahan. Kaparehong credit card din ang ginamit pambili ng mga regalo sa mga inaanak ng pari.

Humingi naman ng tawad ang pari, at ibinahagi na nagsimula na siyang magbalik noong April ng kanyang ginastos na pera. Ayon sa records, may natanggap na $10,000 ang account ng simbahan mula sa savings ni Kozak.