PATOK ngayon ang kahit anong ilabas galing sa  Korea. Mapa K-drama, K-pop, pagkain o fashion.

Hindi maitatanggi ang lakas ng impluwensya ng Korean market. Lahat kumakagat, walang pinipiling edad. Pero syempre, mas malakas ang benta sa kabataan.

Sa Central Square, Bonifacio High Street sa Taguig City, binuksan na ang bagong Korean restaurant — ang BB.Q Chicken, Korea’s Finest Fried Chicken.

Imbitado sa opening ng bagong restaurant ang ilan sa mga personalidad gaya nina Enchong Dee, Christine Reyes at Markus Patterson.

“Due to the historic BB.Q results in the Korean market and rapid growth in North America, we opened here (in the Philippines) to serve as the Southeast Asian Hub of Genesis BB.Q Group to write a history of its success from the Philippines, the largest market Southeast Asia,” sinabi ng Jack Hyunsoo Noh, CEO of LCS Group in Korea.

Isa sa mga nasa likod ng bagong business venture si dating Narvacan Mayor Luis “Chavit” Singson.

“LCS group, we are now partnered with start-up company in Korea, kami nagbibigay ng kapital sa mga bagong negosyante. Pinag-aaralan namin lahat yan, then bibigyan namin sila ng kapital as tulong sa mga bagong negosyante lalong lalo na sa kabataan,” ani Singson.

Para kay Singson, malaki talaga ang impluwensya ng Korea sa ating bansa.

“Some koreans, di lang negosyo, dito na rin sila tumitira. Dito na rin nag-aasawa, they have their own families now,” dagdag pa niya.

Pag dating naman sa pag-nenegosyo, may payo ang tycoon sa mga batang nagsisimula pa lamang.

“Ang negosyo, kailangan tutok lang. Hands on ka, kailangan. Di pwedeng pabayaan mo, kailangan naka-tutok ka, bantayan mo. Planuhin nang mabuti, hindi ‘yung (nakabalita ka) pasok ka na agad. So you have to study, pag-aralan mo and hands on ka sa lahat ng bagay,” paliwanag ni Singson.